أجمل ابيات شعرية لرمضان......

بسم الله الرحمن الرحيم

رمضان شهر الفضل والكرم والخـيرات
شهر المأكولات والمشروبات والحلويات
وأهمها الشوربة والسمبوسك والكنافات
والله الله على السوبيا والبليلة واللقيمات
والتمييز والفول المبخّـر وعليه جمـرات
كل دا تأكله وتقول يالله كمان هات وهات
*****
شهر المقاضي والشنـط والملبوسـات
أسواق مليانه وعروض وتخفيـضـات
موسم مهرجانات وسحوبات وكوبونات
والتجار فرحانين .. وكيف ما يفرحوا
بعد ما نظّفوا المستودعات

*****

والشباب سهر للصبح ونهار في أحلى منامـات
تسـكّع في الشوارع ولعب وكوره ومباريات
والحريم شغالين ما بين خرجه ودخـلة وزيارات
وخروج لتراويح ومن مسجد لمسجد في تنقّلات
تدّور أبو صوت حلو وبكاء ولا تدري عن الآيات
*****
أما الفضائيات وما أدراك ما الفضائيات
فوازيـر بالهبَل وبرامـج ومسـابقات
حفلات غنا ء وخيمات رقص وسهرات
وفيديو كليب وأفلام تعبانه ومسلسلات
ولا تناِقش في طاش ومقالب فنانين وفنانات
يضاربوك أهل الدشوش والقنوات والريموتات
ترى كل ما تقدم من أركان رمضان ومن الواجبات
كيف ما تبغى الناس تحب شهر مليان بالمـلذات
*****
لا تصدقوني تراني متألمة على ما ذكـر من صفـات
حزني عليـك يا رمـضان يا أبو الفتـوح والغـزوات
يا أبـو الأجـور والكـرم والحسـنات المضاعفات
فيـك سـطّر أسلافنا أروع وأشهر المـلحـمـات
بجـهـاد مخـلص ضـد العدو والنفـس والشهوات
تركوا فيـك كل رغبـة وهوى وشـهوة ومـلـذات
فهـمـوا بسرعـة أن الصـوم ما هـو ترك المباحات
بل أهـم منها ترك العـبـث والحـرام والمـكروهات
ولا غـيبـة و نمـيـمة و كـذب أو نظـر لمحرمـات
ولا ضياع أوقـات على فـوازير وأفلام ومـسابـقات
ولا شيـشة وبلـوت وسمر على أرصفة وفـ ديوانيات
ولا سب وشـتائم ونرفـزة وسمـاع أغاني ومحـرمـات
ولا سفـور نساء وبهرجة في المسـاجـد وفي الـمحلات

*****
سلفنا الصالح لو شافوا مسلمـين اليوم والمسلمات
كان اتندموا كثير وتحسّروا على ما كان زمان وفات
كيف يكون دا حـال مسلمين ومؤمنين ومؤمنات
كيف يبغوا يكسبوا بحالهم دا أي أجور وحسنـات
صيـامهم ما حيكون إلا جوع وعطش ونـدامـات
وصلاتهم وقيامهم جهـد وتعـب وبدون أي جزاءات
انتبهوا من لعـبة إبلـيـس يا مؤمنـين ويا مؤمـنات
أشغلكم بالتوافه والعـبـث وضيع عليـكم الفائدات

*****
رمضان شهر الكرم والصـدقة والجود والعـطاءات
فـ كل ليلة عتق من النار وفيه تفتح أبـواب الجنات
وفيه ليلة خير من ألف شهر بما فيه من أيام وساعات
وينادي ربنّا كل يوم يوشك عبادي أن يصيروا للجنات
وفيه تصفّد الشياطين والمردة وفيه تضاعف الحسنات
وفيه أكلة سحور مبروكة وفـ تأخيرها كل البركات
وفيه فتح مكة و غـزوة بدر وغيرهـا من الفتوحات
عمرته تعدل حجة مع النبيّ عليـه أفضل الصلوات
ورمضان جُنّة من النار وحصن مو زيّ أي حصونات
وفيه تستغفر الملائكة لكل الصائميـن والصائـمات
ودعاء الصائم عند فطره من الدعـوات المستجابات
وجبريل يدعو على اللي أدركوه ولم يغفر لهم ما فـات
للصائم فرحتان فرحة بفطره وفرحة بلقاء رب البريات
الريان باب مخصـص للصائـمين يدخلوا منه للجنات

*****

كل هذا الفضل اللّي ذُكر ولسه بنفكر في ملذات
لا تـحزن لا تيأس إحنا لسّه في بـداية الأوقات
قدامنا فرصة للتـوبـة وبـذل الجهد والتضحيات
عسـى نحصّـل ما نقـدر من موسم الخير والجنات
*****
يآلله شمّر يا مسلم واطرد عنّك الكسـل والشهوات
ابدأ صفحة جديدة مع الله في موسم الخيـر والعطاءات
عساك تفلح وتُكتب آخر الشهر من الفائزين والفائزات
ومن اللّي يستلموا بيمينـهم أثمن وأغلى الصحيفات


تحياتـي